Mɔɔ lumua la a le kɛ bɛkɛbɔ mɔdenle kɛ edwɛkɛ ne abohilelɛ kɛbikye Hibulu nee Giliki aneɛ ne mɔ mɔɔ bɛlumuale bɛvale bɛhɛlɛle Baebolo ne la kpalɛ kpalɛ na bɛnrɛva debie gyɛne bɛnrɛboka nwo anzɛɛ bɛnrɛye bie bɛnrɛvi nu.
Mɔɔ tɔ zolɛ nwiɔ la a le kɛ ɔwɔ kɛ Nzema mɔɔ bɛfa bɛahɛlɛ la yɛ tagyee mɔɔ awie biala te ɔ bo ndɛndɛ la. Yɛdie yɛdi kɛ ɔle Nyamenle ɛhulolɛ kɛ menli kɔsɔɔti wɔ awolɛndoazo kɔsɔɔti anu kɛgenga Nyamenle Edwɛkɛ ne, bɛkɛde ɔ bo kpalɛ, na bɛkɛva bɛkɛbɔ ɛbɛla.
Menli mɔɔ lile gyima ne la bɔle mɔdenle lile zɛhae ngyehyɛlɛ ne azo.
Ninyɛne bie eza wɔ Baebolo ye anu mɔɔ yɛkulo kɛ kengavolɛma yɛ bɛ nzonlɛ a:
Bɛkɛnwu kɛ bɛbuke Buluku ko biala mɔɔ wɔ Baebolo ne anu la anye ekyii na bɛhile ninyɛne mɔɔ kengavolɛ ne banwu bɛ nu la. Bɛyɛ ɛhye kɛ bɛfa bɛamaa kengavolɛma anyia mɔɔ bɛbagenga la anwo adwenle.
Akee bɛhile ɛleka bieko mɔɔ edwɛkɛ ne mɔɔ kengavolɛ ne banwu ye wɔ ngyehyɛnu ne bie mɔ anu la wɔ la wɔ mukelɛ biala abo aze; nvoninli noko wɔ nu mɔɔ bamaa kengavolɛ ne ade mɔɔ ɔlɛkenga la abo a.
Edwɛkɛ ne bie mɔ wɔ ɛkɛ a bɛnle Nyamenle Edwɛkɛ mbuluku dɛba ne bie mɔ anu. Edwɛkɛ zɛhae mɔ bɛva bɛ bɛwula ekuku zɛhae [] anu. Edwɛkɛ agbɔkɛ bie mɔ wɔ ɛkɛ a bɛ bo ɛdelɛ ɛnla aze, yɛɛ bie mɔ ɛnle kɛ mɔɔ bɛte bɛ dɛba la noko yɛsuzu kɛ mɔɔ bɛhɛlɛ la le kpalɛ tɛla dɛba ne. Edwɛkɛ agbɔkɛ zɛhae mɔ, bɛhile nu wɔ Buluku ne awieleɛ lɔ, ɛleka mɔɔ bɛhɛlɛ “Edwɛkɛbohilelɛ” la.

Bɛhyɛ Buluku ko biala anu ngyebangyeba, bɛbɔ mɔɔ kengavolɛ ne banwu ye wɔ nu la kpɔkɛ na bɛhɛlɛ ye wɔ ɔ ti zo, yɛɛ bɛhile ɛleka fofolɛ mɔɔ kengavolɛ ne kɛnwu mɔɔ ɔlɛkenga la bieko wɔ buluku ne anu la.